Viṃśatitamaekaviṃśatitamaścādhikāraḥ
Technical Details
viṃśatitamaekaviṃśatitamaścādhikāraḥ
liṅgavibhāge dvau ślokau |
anukampā priyākhyānaṃ dhīratā muktahastatā|
gambhīrasaṃdhinirmokṣo liṅgānyetāni dhīmatāṃ||1||
parigrahe 'dhimuktyāptāvakhede dvayasaṃgrahe|
āśayācca prayogācca vijñeyaṃ liṅgapañcakaṃ||2||
bodhisatvā hi satataṃ bhavantaścakravartinaḥ|
prakurvanti hi satvārthaṃ gṛhiṇaḥ sarvajanmasu||3||
ādānalabdhā pravrajyā dharmatopagatā parā|
nidarśikā ca pravrajayā dhīmatāṃ sarvabhūmiṣu||4||
aprameyairguṇairyuktaḥ pakṣaḥ pravrajitasya tu|
gṛhiṇo bodhisatvāddhi yatistasmādviśiṣyate||5||
paratreṣṭaphalecchā ca śubhavṛttāvihaiva ca|
nirvāṇecchā ca dhīrāṇāṃ satveṣvāśaya iṣyate|
aśuddhaśca viśuddhaśca suviśuddhaḥ sarvabhūmiṣu||6||
praṇidhānātsamāccittādādhipatyātparigrahaḥ|
gaṇasya karṣaṇatvācca dhīmatāṃ sarvabhūmiṣu||7||
karmaṇaścādhipatyena praṇidhānasya cāparā|
samādheśca vibhutvasya cotpattirdhīmatāṃ matā||8||
lakṣaṇātpudgagalācchikṣāskandhaniṣpattiliṅgataḥ|
nirukteḥ prāptitaścaiva vihāro bhūmireva ca||9||
śūnyatā paramātmasya karmānāśe vyavasthitiḥ|
vihṛtya sasukhairdhyānairjanma kāme tataḥ param||10||
tataśca bodhipakṣāṇāṃ saṃsāre pariṇāmanā|
vinā ca cittasaṃkleśaṃ satvānāṃ paripācanā||11||
upapattau ca saṃcitya saṃkleśasyānurakṣaṇā|
ekāyanapathaśliṣṭā 'nimittaikāntikaḥ pathaḥ||12||
animitte 'pyanābhogaḥ kṣetrasya ca viśodhanā|
satvapākasya niṣpattirjāyate ca tataḥ param||13||
samādhidhāraṇīnāṃ ca bodheścaiva viśuddhatā|
etasmācca vyavasthānādvijñeyaṃ bhūmilakṣaṇam||14||
viśuddhadṛṣṭiḥ suviśuddhaśīlaḥ samāhito dharmavibhūtamānaḥ|
saṃtānasaṃkleśaviśuddhibhede nirmāṇa ekakṣaṇalabdhabuddhiḥ||15||
upekṣakaḥ kṣetraviśodhakaśca syātsatvapāke kuśalo maharddhiḥ|
saṃpūrṇakāyaśca nidarśane ca śakto 'bhiṣiktaḥ khalu bodhisatvaḥ||16||
dharmatāṃ pratividhyeha adhiśīle 'nuśikṣaṇe|
adhicitte 'pyadhiprajñe prajñā tu dvayagocarā||17||
dharmatatvaṃ tadajñānajñānādyā vṛttireva ca|
prajñāyā gocarastasmād dvibhūmau tadvyavasthitiḥ||18||
śikṣāṇāṃ bhāvanāyāśca phalamanyaccaturvidham|
animittasasaṃskāro vihāraḥ prathamaṃ phalam||19||
sa evānabhisaṃskāro dvitīyaṃ phalamiṣyate|
kṣetraśuddhiśca satvānāṃ pākaniṣpattireva ca||20||
samādhidhāraṇīnāṃ ca niṣpattiḥ paramaṃ phalaṃ|
caturvidhaṃ phalaṃ hyetat caturbhūmisamāśritam||21||
dharmatāṃ pratividhyeha śīlaskandhasya śodhanā|
samādhiprajñāskandhasya tata ūrdhvaṃ viśodhanā||22||
vimuktimuktijñānasya tadanyāsu viśodhanā|
caturvidhādāvaraṇāt pratighātāvṛterapi||23||
aniṣpannāśca niṣpannā vijñeyāḥ sarvabhūmayaḥ|
niṣpannā apyaniṣpannā niṣpannāśca punarmatāḥ||24||
niṣpattirvijñeyā yathāvyavasthānamanasikāreṇa|
tatkalpanatājñānādavikalpanayā ca tasyaiva||25||
bhāvanā api niṣpattiracintyaṃ sarvabhūmiṣu|
pratyātmavedanīyatvāt buddhānāṃ viṣayādapi||26||
adhimuktirhi sarvatra sālokā liṅgamiṣyate|
alīnatvamadīnatvamaparapratyayātmatā||27||
prativedhaśca sarvatra sarvatra samacittatā |
aneyānunayopāyajñānaṃ maṇḍalajanma ca || 28 ||
nācchando na ca lubdhahrasvahṛdayo na krodhano nālaso
nāmaitrīkarūṇāśayo na kumatiḥ kalpairvikalpairhataḥ|
no vikṣiptamatiḥ sukhairna ca hato duḥkhairna vā [vyā]vartate|
satyaṃ mitramupāśritaḥ śrutaparaḥ pūjāparaḥ śāstari||29||
sarvaṃ puṇyasamuccayaṃ suvipulaṃ kṛtvānyasādhāraṇaṃ
saṃbodhau pariṇāmayatyaharaharyo hyuttamopāyavit|
jātaḥ svāyatane sadā śubhakaraḥ krīḍatyabhijñāguṇaiḥ
sarveṣāmuparisthito guṇanidhirjñeyaḥ sa buddhātmanaḥ||30||
śamathe vipaśyanāyāṃ ca dvayapañcātmako mataḥ|
dhīmatāmanuśaṃso hi sarvathā sarvabhūmiṣu||31||
paśyatāṃ bodhimāsannāṃ satvārthasya ca sādhanaṃ|
tīvra utpadyate modo muditā tena kathyate||32||
dauḥ śīlyābhogavaimalyādvimalā bhūmirucyate|
mahādharmāvabhāsasya karaṇācca prabhākarī||33||
arcirbhūtā yato dharmā bodhipakṣāḥ pradāhakāḥ|
arciṣmatīti tadyogātsā bhūmirdvayadāhataḥ||34||
satvānāṃ paripākaśca svacittasya ca rakṣaṇā|
dhīmadbhirjīyate duḥkhaṃ durjayā tena kathyate||35||
ābhimukhyād dvyasyeha saṃsārasyāpi nirvṛteḥ|
uktā hyabhimukhī bhūmiḥ prajñāpāramitāśrayāt||36||
ekāyanapathaśleṣādbhūmirdūraṃgamā matā|
dvyasaṃjñāvicalanādacalā ca nirucyate||37||
pratisaṃvinmatisādhutvādbhūmiḥ sādhumati matā|
dharmameghā dvayavyāpterdharmākāśasya meghavat||38||
vividhe śubhanirhāre ratyā viharaṇātsadā|
sarvatra bodhisatvānāṃ vihārabhūmayo matāḥ||39||
bhūyo bhūyo 'mitāsvāsu ūrdhvaṃgamanayogataḥ|
bhūtāmitābhayārthāya ta eveṣṭā hi bhūmayaḥ||40||
bhūmilābhe[bho]'dhimukteśca cariteṣu ca vartanāt|
prativedhācca bhūmīnāṃ niṣpatteśca caturvidhaḥ||41||
mahāyāne 'dhimuktānāṃ hīnayāne ca dehināṃ|
dvayorāvarjanārthāya vinayāya ca deśitāḥ|
caryāścatasro dhīrāṇāṃ yathāsūtrānusārataḥ||42||
anukampakasatveṣu saṃyogavigamāśaya|
aviyogāśaya saukhyahitāśaya namo'stute||43||
sarvāvaraṇanirmukta sarvalokābhibhū mune
jñānena jñeyaṃ vyāptaṃ te muktacitta namo'stute||44||
aśeṣaṃ sarvasatvānāṃ sarvakleśavināśaka|
kleśaprahāraka kliṣṭasānukrośa namo'stute||45||
anābhoga nirāsaṅga avyāghāta samāhita|
sadaiva sarvapraśnānāṃ visarjaka namo'stu te||46||
āśraye 'thāśrite deśye vākye jñāne ca deśike|
avyāhatamate nityaṃ sudeśika namo'stute||47||
upetya vacanaisteṣāṃ carijña āgatau gatau|
niḥ sāre caiva satvānāṃ svavavāda namo'stu te||48||
satpauruṣyaṃ prapadyante tvāṃ dṛṣṭvā sarvadehinaḥ|
dṛṣṭamātrātprasādasya vidhāyaka namo 'stu te||49||
ādānasthānasaṃtyāganirmāṇapariṇāmane|
samādhijñānavaśitāmanuprāpta namo'stu te||50||
upāye śaraṇe śuddhau satvānāṃ vipravādane|
mahāyāne ca niryāṇe mārabhañja namo 'stu te||51||
jñānaprahāṇaniryāṇavighnakārakadeśika|
svaparārthe 'nyatīrthyānāṃ nirādhṛṣya namo 'stu te||52||
vi[ni]gṛhyavaktā parṣatsu dvyasaṃkleśavarjita|
nirārakṣa asaṃmoṣa gaṇakarṣa namo'stu te||53||
cāre vihāre sarvatra nāstyasarvajñaceṣṭitaṃ|
sarvadā tava sarvajña bhūtārthika namo'stu te||54||
sarvasattvārthakṛtyeṣu kālaṃ tvaṃ nātivartase|
abandhyakṛtya satatamasaṃmoṣaḥ namo'stu te||55||
sarvalokamahorātraṃ ṣaṭkṛtvaḥ pratyavekṣase|
mahākaruṇayā yukta hitāśaya namo'stu te||56||
cāreṇādhigamenāpi jñānenāpi ca karmaṇā|
sarvaśrāvakapratyekabuddhottama namo'stu te||57||
tribhiḥ kāyairmahābodhiṃ sarvākārāmupāgata|
sarvatra sarvasatvānāṃ kāṅkṣāchida namo'stu te||58||
niravagraha nirdoṣa niṣkāluṣyānavasthita|
āniṅkṣya sarvadharmeṣu niṣprapañca namo'stu te||59||
niṣpannaparamārthoṃ 'si sarvabhūmiviniḥsṛtaḥ|
sarvasatvāgratāṃ prāptaḥ sarvasatvavimocakaḥ||60||
akṣayairasamairyukto guṇairlokeṣu dṛśyase|
maṇḍaleṣvapyadṛśyaśca sarvathā devamānuṣaiḥ||61||
|| mahāyānasūtrālaṃkāreṣu vyavadātasamayamahābodhisatvabhāṣite caryāpratiṣṭhādhikāro nāmaikaviṃśatitamo 'dhikāraḥ ||
|| samāptaśca mahāyānasūtrālaṃkāra iti ||